Manglande innsikt i skittentøysortering, det finaste serviset på full guffe i oppvaskmaskina, lasagneforma som enno står i bløyt i oppvaskkummen, uoppreidd seng og hårtustar etter nok ei barbering i vasken på badet. Og dersom du er så syndig å nemne berre ein liten flik av alt det som frustrerer deg får du berre eit stort flir tilbake. Mannen ler av deg og drar deg ned i sofaen for å sjå siste ekstraomgangen. Helsiken!
Du boikottar klesvasken i eit iherdig forsøk på å oppdra mannen din til å overraske deg med tom kleskorg når du kjem trøtt og sliten heim frå jobb; han ligg på sofaen og kan fortelje deg det aller siste innanfor tippeligaen og kva som kjem til å skje dersom BRANN endeleg vinn serien. Dei kan skuldast for mangt og gjere oss kvinner så frustrerte at vi riv oss i håret og kastar oss utfor terrassen av sinne og eksplosjon over manglande interesse og forståing. Du gir no vel ein god F i om dei vinn!! Du hoppar opp og ned på stuegolvet og trampar i golvet og riv deg endå meir i håret før du vurderer terrassen, men sjølv om du allereie har nemnt kor høgt det er ned og at du snart vurderer å kaste deg utfor får du berre eit smil tilbake – ”Hæ?”
Slik hugsar eg det. Likevel er eg altså i ferd med å dedisere dette innlegget til menn som trass sine generelle uttrykk av einfald ordnar med forsikringar, klatrar opp på taket og festar lause taksteinar, monterer høgtalarane perfekt i stua med lange nok leidningar til å sitte ved spisebordet med pcen og ikkje måtte klistre seg oppi bokhylla der anlegget står for både å surfe på nettet og høyre på musikk samtidig. Til menn som kjøper skøyteleidningar og gir deg mulegheita til både oljeomnsvarme og å sjå på dvd til same tid. Til menn som tømmer oska i peisen og hugsar å sette ut søpla kvelden før søppelbilen kjem. Til menn som opnar panseret på bilen og sjekke om det må fyllast på meir olje eller om det er tilstrekkeleg til ein ny tur langs fjordar og fjell på Vestlandet. Til menn som lar deg pusle med ditt, besøke venninner, sykle tur, halde deg i form med litt andre syslar enn å bære tunge ting mellom kjellar og loft, sparkle, male, legge fliser og bære endå fleire ting mellom kjellar og loft. Til menn som tek ansvar, spør deg om du har det bra, ønskjer deg ein fin dag på jobb og seier at dei kan lage middag til du kjem heim sidan du må jobbe overtid i dag.
I dagens likestilte samfunn; til alle dei.
